[ من صفحة الكنز 2: الحب والمصير ]
Review “El Kenz II” Movie.
الفيلم بطولة محمد رمضان ومحمد سعد وهند صبري. السيناريو لعبد الرحيم كمال وإخراج شريف عرفة. كل الcrew اللي هما هما اشتغلوا في الجزء الأول.
القصة بتكمل بعد الجزء الأول بعد المعركة اللي كانت هاتحصل من أجل الحب عشان نشوف مصير كل بطل في ال٣ حواديت هيبقي ايه.
مبدأياً الposters بتاعة الفيلم حلوة جدا وفكرة حلوة جدا جدا انهم يعملوا بوستر لكل حدوتة كأنهم ٣ أفلام عشان ميقللوش من قيمة الأبطال التلاتة.
ياللا نبدأ بالسيناريو في ال٣ حواديت.
الحدوتة الأولي : حدوتة هند صبري السيناريو فيها كان شوية يبقي لغة عامية وشوية يبقي لغة عربية وده مش حلو.
الحدوتة الثانية : حدوتة محمد رمضان السيناريو فيها كان عبارة عن ارشادات ونصايح وده مش حلو + كوميديا حلوة جداً.
الحدوتة الثالثة : حدوتة محمد سعد السيناريو فيها كان الأفضل علي الاطلاق وكان السيناريو وازن نفسه جدا ومتماسك. وقت الجد جد مع شوية كوميديا بسيطة بردو وكانت حلوة جدا.
التصوير والاخراج كانوا كويسين.
أما بقا تصميم المعارك اللي كان بيخوضها محمد رمضان بالسيف كانت نفسها هي هي في نفس المشاهد ونفس الحركات وتقريبا نفس الترتيب فا كان المفروض يكون في تنوع في techniques المعارك.
الجرافيكس كانت وحشة جداً في مشهدين واحد منهم كان مهم ومدته الزمنية طويلة وقلب مشهد هندي كمان بتمثيل عبد العزيز مخيون فيه لكن باقي مشاهد الجرافيكس كانت كويسة. أحمد مالك اول مشهد دخل فيه كان كانه بيتخانق مش بيمثل وهو اصلا كان مش مركز مع الدور والتمثيل فا أداؤه كان وحش جدا. الكومبارسات اللي في العصر الفرعوني كان لازم جسمهم يبقي احسن من كده لان كلهم كانوا تخان وبكروش وده مش صحيح لان كل التماثيل اللي معمولة للفراعنة اجسامهم كانت ممشوقة. (محمد سعد، هند صبري، محمد رمضان، روبي، احمد رزق، احمد صيام، احمد حاتم، سارة عبدالرحمن، امينة خليل، هاني عادل، نهي عابدين، هيثم احمد زكي) مثلوا كويس ماعدا (محي اسماعيل وجمال عبد الناصر وعبدالعزيز مخيون واحمد مالك) اداؤهم كان سيئ.
فيلم الكنز ككل لو هوصفه بكلمة واحدة هقول عنه انه Masterpiece لانه فعلا كان ممتع واحلي من الجزء الأول بكتييير وباقي العناصر كانت كويسة سواء الديكور او المونتاج طبعا اللي كان حلو اوي والاغاني اللي في الفيلم كمان كانت حلوة جدا. رسالة الفيلم كمان كانت مؤثرة وجميلة.
“El Kenz II” Movie. (8/10)
