[ من صفحة هند صبري أفضل ممثلة عربية مصرية تونسية ]
انا بالنسبالى هند صبري أفضل ممثلة عربية 
كتير جداا ناس لما بتتفرج على هند صبرى بيفتكر أنها من مصر ولما تقولهم أنها من تونس مش بيصدقوا ودة لأنها فى كل أدوارها بننسى وبنستبعد فكرة أنها مش من مصر ودة عشان إتقانها واحترافيتها دة بجانب انها ممثلة من العيار الثقيل
عملت ادوار وشخصيات صعبة ومميزة ، عملت شخصية كريمة الصعيدية فى الجزيرة إللى لو كانت عملتها فى مسلسل نسل الاغراب كنت شوف المسلسل كان هيبقى فين وعامل ازاى ، عملت شخصية حورية فى ابراهيم الابيض ، عملت شخصية يسرية فى فيلم احلى الاوقات واللى كانت اكتر شخصية مفضلة فى الفيلم ، عملت شخصيات صعبة فى افلام زى اسماء افضل فيلم بطولة نسائية واحلام نوارة ، عملت شخصية حتشبسوت الملكة المصرية فى فيلم الكنز
عملت اكتر شخصية نسائية مفضلة عندى فريدة فى الفيل الازرق اللى بالنسبالى مفيش ممثلة تقدر تعمله غيرها ويسلام على مشاهدها فى الاوضة اللى كانت محبوسة فيها وبتتكلم مع كريم عبد العزيز ولا لما بترفع أيدها وبتقول لا تخافوا ولكن احظروا
عملت افضل مسلسل عربى مصرى بالنسبالى حلاوة الدنيا اللى فاقت كل التوقعات فيه ،سمعته اكتر من ٢٥ مرة ودة انا ناوية اعمله بوست لوحده
لو جبنا سيرة الأعمال الكوميدية بيجى فى بالنا كام عمل اللى هما التوب وبيبقى من ضمنهم مسلسل عايزة اتجوز واللى يعتبر من افضل المسلسلات الكوميدية اللى اتعملت واللى يعتبر سابق زمنه ،دة لو كان نزل اليومين دول فى وجود السوشيال ميديا كان عمل ايه ، كل حلقة وقصة يتعمل منها مسلسل ،مشاهدها لما تكلم نفسها بتعمل شوية ريأكشنات بتاريخ ممثلة من بتوع اليومين دول
مش تفخيم والله بس هند صبرى خارج اى مقارنة لأنها فى حتة لوحدها مفيش دور شبه التانى كل أدوارها مختلفة وباداء مختلف وصعب انك تصنفها فى نوع معين لأنها ببساطة بتعمل كل الانواع وبالنسبالى واقول تانى هند صبري أفضل ممثلة عربية مصرية تونسية
