زي النهاردة سنة 2005 كان العرض العالمي الأول لفيلم Cinderella Man من إخراج رون هاورد وبطولة راسل كرو وريني زيلويجر وبول جياماتي.
الفيلم بيحكي قصة الملاكم جيم برادوك اللي كان بيلعب في ظروف اجتماعية واقتصادية صعبة جدا أيام الكساد الاقتصادي الكبير في الثلاثينات من القرن الماضي، ورغم كده كان بيكافح هو وزوجته وأولاده عشان يعيشوا حياة كريمة وميبقوش ضحية للفقر والمجتمع الطبقي الذي لا يرحم أيامها. وفي وسط كل الظروف السيئة اللي عاشها وكل الصعاب اللي مر بيها، مفقدش إيمانه بنفسه وأسرته، وفضل يحبهم ويعاملهم بنفس اللطف والجمال والعذوبة رغم كل شيء، ولذلك استحق عن جدارة لقب “رجل السندريلا”.
في صحفي أمريكي شهير قال إن لو في ملاكم واحد بس جدير إن قصته تتحكي فهو جيم برادوك، الملاكم والإنسان والزوج والأب والرجل السندريلا.
لو مشفتش الفيلم ده، ننصحك تشوفه. هتستمع بقصة إنسانية جميلة وممتعة جدا، وبأداء راقي للغاية من راسل كرو وريني زيلويجر وبول جياماتي، والأخير بالذات اترشح عن دوره لأوسكار أفضل ممثل مساعد، وكان بيقوم بدور مدرب جيم في الفيلم.
