elCinema.com

نولان العظيم

[ من صفحة Dunkirk ]
DUNKIRK 2017
Directed By: Christopher Nolan
عايز أقول كام حاجة عن فيلم Dunkirk
أولاً فيلم Dunkirk هو فيلم درامي ممتع و شيق وشدني من أول ما ظهرت شركة Warner Bros. على الشاشة لحد ما ظهرت في تتر النهاية، الفيلم مش فيلم حرب هو في المقام الأول درامي تاريخي يعني للناس الي بتحب الدراما ومش هتشوف فيه الي الضرب والبهدلة زي مثلاً الي في فيلم Saving Private Ryan…
كريستوفر نولان أظهر إنه مخرج عبقري حتى إنه خرج من العالم بتاعه الي هو بيستخدمه دائماً ومتميز فيه ومفيش حد يقدر يتقارن معاه فيه…
تاني حاجة نولان بيثبت في كل فيلم ليه إن هو أفضل واحد بيستخدم الكاميرا الأيماكس ومفيش حد يتقارن معاه برضه، كادرات نولان وحركة الكاميرا بتاعته المذهلة لا يقارنوا بأي حد بيشتغل بالايماكس كاميرا بالشكل ده، طبعاً مدير تصوير الفيلم Hoyte Van Hoytema الي هو برضه مدير تصوير فيلم Interstellar كان في نفس الشغل بس مطور أكتر…
ألوان الفيلم رائعة رائعة رائعة وتخليك تتشد للصورة جداً وديكور الفيلم مذهل وكان واضح شغل عالى جداً…
بإختصار شديد فيلم Dunkirk تجربة بصرية فريدة وجميلة جداً…
الجزء التاني هو الصوت…
الصوت من بداية الفيلم لأخره مذهل الميكساج وقطعات الصوت " رهيبة " يعني بإختصار ومن غير كلام كتير مكانه في الأوسكار موجود في الصوت وممكن يكون هو الأقرب لجوائز الصوت ده لو مظهرش فيلم ينافسه…
الجزء الثالث هو السيناريو والإخراج
السيناريو وطريقة سرد أحداث الفيلم حلوة جداً وشيقة يمكن بس كان الحوار لازم يكون أحسن وبعيد عن الجمل الخطابية " بس ده تاريخهم فما علينا يعني " بس هو بعض النظر عن الكلام ده السيناريو كويس جداً و محكم و شيق وإنت أصلاً بتكون داخل الفيلم وعارف الي هيحصل في الأخر وبرضه متوتر ومشدود للفيلم…
وأهم أسباب الإثارة في الفيلم وصاحب الشأن الكبير هو الإخراج الي لعب دور كبير أو الدور كله عليه على خلق الإثارة والإبهار في الفيلم وتنوع كادرات الفيلم وحركة الكاميرا الي في وقتها مع قطعات المونتاج الي بتشدك أكتر إنك متنزلش عينك من على الشاشة.
وأخيراً الموسيقى التصويرية للفيلم…
العبقري هانز زيمر المبدع الي بيدخلك عالم كل فيلم ويعيشك فيه الي بيعتمد على الموسيقى الي بيقولوا عليها بتخطف الأذهان الي برضه لعبت دور كبير في زيادة الإثارة في الفيلم وأهم حاجة إنها كانت متوظفه بطريقة مثالية.
فيلم Dunkirk فيلم رائع بكل المقاييس وأنصحكم بمشاهدة الفيلم أيماكس ولو معرفتوش اتفرجوا عليه بأي شكل…
يمكن الفيلم هو مش أفضل أعمال كريستوفر نولان بس هو مُختلف عن بقيت أفلامه بس هو من أفضل أفلامه وبرضه عليه لمسة نولان البصرية والسمعية وحتى في أسلوب السرد.
نولان عبقري بِكُل المقاييس حتى لو هيعمل فيلم كوميدي.